Англия терма жамоаси собиқ ҳимоячиси Мэттью Апсон Лондоннинг «Арсенал» клуби Чемпионлар Лигасида ғолиб чиқиш имкониятлари ҳақида нималар деб ўйлашини айтди. Бугун Микель Артета жамоаси Мадридда «Атлетико»га қарши дастлабки ярим финал учрашувини ўтказади. Жавоб ўйини эса 5 май куни бўлиб ўтади.

«Бизни, шубҳасиз, эҳтиёткорона ўйин кутмоқда. Ростини айтсам, ҳар иккала баҳс ҳам анча зерикарли кечади деб ўйлайман, аммо «Арсенал»да финал йўлланмасини қўлга киритиш учун ажойиб имконият бор — у ерда эса ғалабагача атиги бир қадам қолади. «Арсенал» «ПСЖ» ёки «Бавария»га қарши финалда фаворит бўладими? Катта эҳтимол билан — йўқ, чунки бу жамоаларнинг ҳозирги спорт формаси ва руҳий ҳолати жуда юқори. Лекин финалда ҳар қандай воқеа содир бўлиши мумкин», — дея Апсоннинг сўзларидан иқтибос келтиради Arsenal Radar.

«Тўпчилар» ва «матрасчилар» ўртасидаги бугунги баҳс Тошкент вақти билан тунги соат 00:00 да бошланади.