Чоршанба куни Чемпионлар лигаси ярим финали доирасида Мадриднинг «Атлетико» ва Лондоннинг «Арсенал» жамоалари ўртасидаги дастлабки учрашув (1:1) бўлиб ўтди.

Биринчи бўлим якунида Виктор Дьёкереш пенальтини аниқ амалга оширган бўлса, 56-дақиқада Хулиан Альварес ҳам худди шундай жавоб қайтарди.

Финал ҳуштаги чалинганидан сўнг, «матрасчилар» футболчиси Маркос Льоренте 5 май куни Лондонда бўлиб ўтадиган жавоб учрашуви ҳақидаги фикрлари билан ўртоқлашди.

«Биз иккинчи бўлимда ўйинимизни кучайтирдик — кейинги баҳсда айнан шундан келиб чиқиб ҳаракат қилишимиз керак. Лондонда биз шиддатлироқ ўйнашимиз ва рақиб майдонининг учинчи қисмида иложи борича кўпроқ «бирга-бир» вазиятларни юзага келтиришимиз лозим — бу бизга ўйинда қолиш имконини беради», — дея Льорентенинг сўзларини келтиради УЕФА.

Ушбу қарама-қаршилик ғолиби финалда «ПСЖ» ёки «Бавария» билан тўқнаш келади.