«Челси» ярим ҳимоячиси Энцо Фернандеснинг Мадриднинг «Реал» клубига ўтиши борасидаги хабарлар яна кун тартибига чиқди.

Аргентиналик футболчи анчадан бери «қироллик клуби»нинг трансфер нишони бўлиб келаётган эди. Унинг Мадридда яшаш истаги ҳақидаги шахсий фикрлари эса бу миш-мишларни янада авж олдирди. Эслатиб ўтамиз, ушбу гаплари учун «Челси» раҳбарияти хавбекни иккита ўйинга четлатган эди.

Футболчининг агенти Хавьер Пасторе вазиятга қуйидагича изоҳ берди:

«Реал»нинг Энцога қизиқиши? Бу ҳақда кўп гапиришмоқда, аммо амалда ҳеч қандай жиддий воқеа содир бўлаётгани йўқ. У айни дамда бор эътиборини «Челси»даги мавсумни имкон қадар юқори нотада якунлашга қаратган.

Тўғри, Энцо ўша пайтда унчалик мос келмайдиган фикрларни билдирган бўлиши мумкин, лекин у ҳеч қандай даҳшатли гап айтмаган. У шунчаки ўзига Мадрид шаҳри ёқиши ҳақида гапирган, холос», — дея Пасторенинг сўзларини келтирмоқда Diario AS.

Маълумот ўрнида, 25 ёшли футболчининг Лондон клуби билан амалдаги шартномаси 2032 йилга қадар имзоланган.