«Пари Сен-Жермен» клубининг ўнг қанот ҳимоячиси Ашраф Ҳакимий Чемпионлар лигаси ярим финали доирасидаги «Бавария»га қарши жавоб учрашувида жамоасига ёрдам бера олмайдиган бўлди.

Марокашлик футболчи жамоасининг ўз майдонида кечган ва 5:4 ҳисобидаги ғалабаси билан якунланган дастлабки баҳсида голли узатмага муаллифлик қилган эди. Юлдуз латераль ўйинни охиригача етказиб қўйган бўлса-да, баҳс якунида жароҳат олгани маълум бўлди. Сўнгги маълумотларга кўра, 27 ёшли футболчи Мюнхенда кечадиган муҳим ўйинни ўтказиб юборади.

«Бир марта буни уддалаганман. Яна такрорлайман», — дея ижтимоий тармоқлардаги саҳифасига маҳзун фондаги суратини жойлаштирди Ҳакимий.

Эслатиб ўтамиз, «ПСЖ»нинг «Бавария» меҳмони бўладиган ҳал қилувчи тўқнашуви келаси чоршанба, 6 май кунига белгиланган.