Аргентина терма жамоаси етакчиси Лионель Мессининг турмуш ўртоғи Антонела Рокуццо Португалия терма жамоаси сардори Криштиану Роналдунинг қаллиғи Жоржина Родригесга янги кийим бренди тақдимоти муносабати билан юборилган совға учун миннатдорлик билдирди.

Антонела ўзининг Instagram саҳифасида совғалар жойланган пушти рангли қути суратини жойлаштириб, Жоржинани белгилади.

Аввалроқ Жоржина Родригес спорт ва кундалик кийимлардан иборат шахсий брендини йўлга қўйган эди. Реклама кампанияси доирасида у Антонелага янги коллекциядан эксклюзив совғалар жамланмасини юборди.

«Катта раҳмат, Жоржина. Ҳаммаси жуда ажойиб. Сенга барча ишларингда улкан муваффақиятлар тилайман!» — деб ёзди Антонела Stories саҳифасида.

Маълумот учун, ҳар икки аёл ҳам Аргентина билан боғлиқ. Жоржина Буэнос-Айресда туғилган. Улар шахсан деярли мулоқот қилмайди ва ҳозиргача омма олдида бирга кўриниш бермаган. Шунга қарамай, ижтимоий тармоқларда ўзаро самимий муносабатни сақлаб келмоқда.