Лондоннинг «Арсенал» клуби Мадриднинг «Атлетико» жамоасига қарши кечган дуранг (1:1) натижасидан сўнг Чемпионлар лигасидаги мағлубиятсиз сериясини 13 та ўйинга етказди.

Ушбу муваффақиятли серия давомида «канонирлар» 10 та ғалаба ва 3 та дуранг қайд этишди. Қайд этиш жоизки, кетма-кет 13 ўйинлик мағлубиятсиз серия клубнинг ушбу мусобақадаги мутлақ рекордининг такрори ҳисобланади. Бундан аввал «Арсенал» 2005-2006 йилги мавсумда айнан шундай натижа қайд этиб, якунда финалга қадар етиб борган эди.

Ўшанда Арсен Венгер бошчилигидаги жамоа серияни 14 та ўйинга етказа олмаган — Париж мезбонлик қилган финалда лондонликлар «Барселона»га 1:2 ҳисобида имкониятни бой беришганди.

Эндиликда Микель Артета шогирдлари келаси сешанба, 5 май куни Лондонда «Атлетико»ни қабул қилишади.