Лондоннинг «Арсенал» клуби бош мураббийи Микель Артета Чемпионлар лигаси 1/2 финали доирасидаги «Атлетико Мадрид»га қарши илк учрашув (1:1) ҳақида ўз фикрларини билдириб ўтди.

Мадридда кечган баҳсда ҳар икки гол пенальтидан киритилди: 44-дақиқада Виктор Дьёкереш «канонирлар»ни олдинга олиб чиққан бўлса, 56-дақиқада Хулиан Альварес мувозанатни тиклади.

«Ўйинимизда ижобий жиҳатлар кўп бўлди. Биз кўп йиллардан бери ўз майдонида ажойиб ўйин кўрсатиб келаётган жамоага қарши тўп сурдик, шу боис бизни нималар кутаётганини билардик. Бу ерда баъзан чидашга мажбур бўласан. Кўплаб яхши вазиятларни кўрдим, лекин гоҳида қийналишимизга тўғри келди.

Иккинчи бўлим бошидаги ўйинимиз менга ёқмади — назоратни йўқотиб қўйдик. Сўнгги 15 дақиқада эса ҳаммаси анча яхши кўринди. Биз Чемпионлар лигаси яримфиналидамиз ва ҳолатимиз ёмон эмас. Олдинда ўз уйимиздаги жавоб баҳси кутиб турибди. Ҳаммаси ўз қўлимизда», — дея Артетанинг сўзларини келтирмоқда Movistar.

Эслатиб ўтамиз, ушбу жуфтлик ўртасидаги финалчи номи 5 май куни Лондонда бўлиб ўтадиган жавоб учрашувидан сўнг маълум бўлади.