Лондоннинг «Арсенал» клуби дарвозабони Давид Райя Чемпионлар лигаси ярим финали доирасида Мадриднинг «Атлетико» жамоасига қарши кечган дастлабки баҳс (1:1) ҳақида ўз фикрларини билдирди.

Испания пойтахтида ўтган учрашувда «канонирлар»нинг ягона голига биринчи бўлим якунида пенальтини аниқ ижро этган Виктор Дьёкереш муаллифлик қилди. Майдон эгалари эса 56-дақиқада Хулиан Альвареснинг пенальтидан урган голи эвазига мувозанатни тиклашга муваффақ бўлишди.

«Бу жуда оғир ўйин бўлди. Энди ҳаммаси келаси ҳафтада ҳал қилинади. Қўллаб-қувватлаганингиз учун раҳмат, «канонирлар»!» — деб ёзиб қолдирди Райя учрашув якунланганидан сўнг ўз ижтимоий тармоқларидаги саҳифасида.

Эслатиб ўтамиз, «Арсенал» ва «Атлетико» жамоалари ўртасидаги ҳал қилувчи жавоб учрашуви 5 май куни Лондондаги «Эмирейтс» стадионида бўлиб ўтади.