Нидерландия чемпионатининг юқори дивизиони — Эредивизиядаги камида 133 та ўйин натижаси футболчиларнинг ҳужжатларини расмийлаштиришдаги қоидабузарликлар туфайли бекор қилиниши мумкин. Бу ҳақда ESPN нашри хабар бермоқда.

Манба маълумотларига кўра, 100 дан ортиқ ўйин натижалари қайта кўриб чиқилиши эҳтимоли бор, сабаби бир қатор футболчилар майдонга тегишли ҳужжатларсиз тушган. Уларнинг кўпчилиги терма жамоалар сафида ўйнаш мақсадида иккинчи фуқаролик — Индонезия, Суринам ёки Кабо-Верде фуқаролигини қабул қилган.

Нидерландия қонунчилигига кўра, бундай ҳолатларда футболчилар мамлакат фуқаролигини йўқотиши мумкин ва улар ишлаш учун рухсатнома олишга мажбур бўлади.

“Агар ўйинчи мамлакат фуқаролигидан воз кечса, Нидерландия қонунлари ёки Нидерландия Қироллик футбол иттифоқининг ҳуқуқий таъсир доирасидан чиқиб, бошқа давлат ёки халқаро ташкилотнинг юрисдикциясига ўтади. Амалда у чет элликка айланади”, дейди спорт ва ҳуқуқ профессори Марян Олферс.

Таъкидлаш жоизки, эҳтимолий қоидабузарликлар бир неча йил давомида эътибордан четда қолган. Вазият баҳор ойида, “НАС Бреда” клуби ушбу муаммога эътибор қаратиб, ўйинлардан бирини қайта ўтказишни талаб қилганидан сўнг кескинлашди. Нидерландия Қироллик футбол иттифоқи ушбу талабни рад этганидан кейин клуб апелляция шикоятини киритган.