Журналист Фабрицио Романо ўзининг YouTube’даги дастурининг янги сонида Жозе Моуриньонинг келажагига тўхталиб ўтди. Сўнгги кунларда матбуот совриндор португалиялик мутахассисни «Реал»га қайтиши билан боғламоқда.
Романонинг сўзларига кўра, Моуриньо фаолиятида иккинчи бор «Реал»ни бошқаришни истамоқда, шу сабабли шартнома борасидаги келишувда ҳеч қандай муаммо бўлмайди.
Ҳозирда ҳаммаси «Реал»нинг қарорига боғлиқ. Моуриньо Мадрид клуби унинг қайтиш вариантини фаоллаштиришини кутмоқда.
Эслатиб ўтамиз, Жозе Моуриньо 2010–2013 йилларда «Реал» бош мураббийи лавозимида ишлаган. Ўша даврда «қаймоқранглилар» Испания чемпионати, Испания Кубоги ва Испания Суперкубогида ғолиб чиқишган.
Ҳозирги вақтда Моуриньо «Бенфика»ни бошқармоқда.
