«Бавария»нинг ўнг қанот ҳимоячиси Конрад Лаймер шу ёздаёқ жамоани тарк этиши мумкин. Австриялик футболчининг амалдаги шартномаси 2027 йилнинг ўрталарига қадар мўлжалланган.
Мюнхен гранди келишувни узайтиришга қарши эмас, бироқ футболчининг иш ҳақи борасидаги жорий талабларини (йилига 12-15 миллион евро) қондириш ниятида эмас. Бу ҳақда Bayern & Germany нашри Bild журналистларига таяниб хабар бермоқда. Клуб Лаймерни олдиндаги трансфер ойнасида сотишга тайёр, шунингдек, унинг кейинги мавсум якунида эркин агент сифатида кетишига ҳам рухсат берилиши истисно этилмаяпти.
Конрад Лаймер 2023 йилда «РБ Лейпциг»дан «Бавария»га ўтган эди. Жорий мавсумда 28 ёшли футболчи мюнхенликлар сафида барча турнирларда 42 та ўйинда майдонга тушиб, 3 та гол ва 12 та голли узатмани амалга оширди.
