Халқаро шахмат федерацияси (FIDE) 2026 йил апрель ойи якунларига кўра дунёнинг энг кучли шахматчилари рўйхатини янгилади. Кучли 100 талик рўйхатда Ўзбекистондан 5 нафар гроссмейстер ўрин олди.
Рейтингда ҳамон Магнус Карлсен (2840) пешқадамлик қилмоқда. Иккинчи ва учинчи ўринларни FIDE номзодлар турнирида муваффақиятсиз иштирок этган АҚШ вакиллари Ҳикару Накамура (2792) ҳамда Фабиано Каруана (2788) эгаллаб турибди.
Ўзбекистонлик шахматчиларнинг натижалари:
Нодирбек Абдусатторов классик мусобақада иштирок этмагани сабабли, унинг ҳисобидаги очколар ўзгаришсиз қолди. Айни вақтда Ўзбекистоннинг биринчи рақамли шахматчиси ҳисобланган Нодирбек 2780 очко билан дунё рейтингида 4-поғонада бормоқда.
Кипрда ўтказилган FIDE Номзодлар турнирида жаҳон шахмат элитасининг вакиллари ҳисобланган Фабиано Каруана, Ҳикару Накамура, Рамешбабу Прагнанандҳа (икки марта), Андрей Есипенко ва Вей И каби гроссмейстерлар устидан ғалаба қозониб, чемпионликни қўлга киритган Жавоҳир Синдоров ҳам март ойига нисбатан 6 поғона юқорилади. Айни пайтда Синдоров 2776 очко билан 5-ўринни эгаллаб турибди. Шу тариқа тарихда илк бор Ўзбекистоннинг икки нафар гроссмейстери дунё рейтингида топ-5 таликдан ўрин олди.
Шунингдек, Нодирбек Ёқуббоев ўтган ойга нисбатан тўрт поғона пастлаган бўлса, Ўзбекистон терма жамоаси бош мураббийи Рустам Қосимжонов очколари сони 3 тага кўпайганига қарамай, иккита ўрин пастлади. Кучли юзталикдан жой олган яна бир ўзбекистонлик Шамсиддин Воҳидов эса 87-ўринни банд этиб турибди.
Кучли 100 таликдан яна уч нафар ўзбекистонлик гроссмейстер ўрин олган:
Нодирбек Ёқуббоев — 2689 очко (40-ўрин);
Рустам Қосимжонов — 2665 очко (50-ўрин);
Шамсиддин Воҳидов — 2637 очко (79-ўрин).
Аёллар ўртасидаги Топ-100 таликда ҳам ўзгаришлар кузатилди. Ўзбекистоннинг биринчи рақамли шахматчиси Афруза Ҳамдамова 2423 очко билан 34-ўринга жойлашган. Апрель ойида аёллар ўртасида халқаро гроссмейстер унвонига сазовор бўлган Умида Омонова ҳам ўз ўрнини яхшилади ва ҳозирда 2357 очко билан 88-поғонага коѹтарилди. Ўтган ойга 94-ўринда қайд этилган Гулруҳбегим Тоҳиржонова эса топ-100 таликни тарк этди.
Афруза Ҳамдамова — 2416 очко (34-ўрин);
Умида Омонова — 2347 очко (88-ўрин).
Ўзбекистон эркаклар терма жамоаси FIDE рейтингида 2622 очко билан 9-ўринни эгаллаб турибди. Аёллар жамоаси эса 2252 очко билан 17-ўринда қайд этилган.
