«Барселона» бош мураббийи Ханси Флик Ла Лиганинг 34-туридан ўрин олган «Осасуна»га қарши баҳс олдидан матбуот анжуманида иштирок этди. Учрашув 2 май куни Тошкент вақти билан соат 23:00 да бошланади.

Жароҳатлар ҳақида: «Жароҳатлар — футболнинг бир қисми. Рафинья — ҳар доим майдонда бор имкониятини ишга соладиган футболчи. Унинг сафга қайтгани биз учун жуда муҳим. У бизнинг сардоримиз ва жамоага ижобий кайфият олиб киради.

Ламин Ямал масаласида Испания терма жамоаси тиббий штаби билан алоқада бўлиб турибмиз. Ламиннинг ўзи ҳам терма жамоа мураббийи билан гаплашяпти, унинг тикланиш жараёни яхши кетмоқда. Кристенсен бу мавсум охиригача бирор ўйинда майдонга туша оладими-йўқми, билмайман, аммо Марк Берналь эртага биз билан бирга бўлади», — деди мутахассис.

Шунингдек, Флик ҳакамларнинг бир хил вазиятларга турлича ёндашиши ҳақидаги мунозараларга тўхталишни истамади ва у учун энг муҳими — ўйинлардан завқ олиш эканини таъкидлади.

Ҳозирда «Барселона» 85 очко билан турнир жадвалида пешқадамлик қилмоқда. Мадриднинг «Реал» клуби ҳисобида 74 очко бор. «Осасуна» эса 42 очко билан тўққизинчи ўринни эгаллаб турибди.