Италияда аҳамияти бўйича иккинчи ўринда турувчи футбол дивизиони – Б Сериянинг навбатдаги тур ўйинлари бўлиб ўтди. «Венеция» сафарда «Специя» билан дуранг ўйнади (2:2), аммо шунга қарамай, юқори дивизионга чиқиш масаласини муддатидан олдин ҳал қилди. Бунга «Монца»нинг «Мантуя»га имкониятни бой бергани (2:3) сабаб бўлди.

Чемпионат якунланишига бир тур қолганда Б Серия турнир жадвалининг кучли учлиги қуйидагича кўриниш олган: «Венеция» (79 очко), «Фрозиноне» (78 очко) ва «Монца» (75 очко).

Кўриб турганингиздек, «Венеция» энди иккинчи ўриндан пастга тушиб кетмайди. Бу эса клубни А Серияга йўлланма олгани билан табриклаш мумкинлигини англатади.

«Венеция» юқори дивизионга биринчи уринишдаёқ қайтди — жамоа ўтган йили қуйи лигага тушиб кетган эди.