«Ливерпуль» ҳужумчиси Салоҳ TNT Sports кўрсатувида Стивен Жеррард билан суҳбатлашди. Суҳбат давомида мисрлик футболчи ўзининг «қизиллар» билан Чемпионлар лигасидаги зафарини Стивен Жеррарднинг ғалабаси билан қиёслади.
«Сенинг «Ливерпуль» билан Чемпионлар лигасидаги ғалабанг меникидан кўра узоқроқ вақт эслаб қолинади», — деди Салоҳ табассум билан.
Эслатиб ўтамиз, 2019 йилда Салоҳ билан «Ливерпуль» финалда «Тоттенхэм»ни 2:0 ҳисобида мағлуб этган эди. Стивен Жеррард билан эса жамоа 2005 йилда афсонавий Истанбул финалида ғолиб чиққан. Ўшанда мерсисайдликлар биринчи бўлимдан сўнг 0:3 ҳисобида мағлуб бўла туриб, иккинчи бўлимдаги 6 дақиқа ичида 3 та гол уришга ва ҳисобни тенглаштиришга муваффақ бўлишган. Якунда «қизиллар» пенальтилар сериясида зафар қучишган эди.
