Мюнхеннинг «Бавария» клуби яқинлашиб келаётган ёзги трансфер ойнасида жамоани тарк этиши кутилаётган Леон Горецка ўрнига муносиб номзод изламоқда.

Клуб раҳбарияти бир нечта вариантларни кўриб чиқмоқда. Ҳозирда ижара асосида «Ганновер»да ўйнаётган 20 ёшли Ноэль Азеко Никили, «Герта»нинг 16 ёшли ярим ҳимоячиси Кеннет Айххорн.

Бироқ, франциялик трансфер бозори эксперти Абделлаҳ Бульманинг маълумотларига кўра, «Бавария» «Лилль»нинг 18 ёшли иқтидори Аюб Буаддига бўлган қизиқишини қайта тиклаган. Аввалроқ ҳам унинг немис гранди сафига ўтиши ҳақида хабарлар тарқалган эди.

Буадди учун курашда «Бавария» ёлғиз эмас — футболчига «ПСЖ», «Арсенал» ва «Манчестер Юнайтед» каби клублар ҳам даъвогарлик қилмоқда.

Аюб Буадди жорий мавсумда UNFP талқини бўйича Лига 1нинг энг яхши ёш футболчиси мукофотига номзод қилиб кўрсатилган. У жуда ёш бўлишига қарамай, «Лилль» асосий жамоаси сафида 93 та ўйин ўтказишга улгурди (улардан 25 таси еврокубокларда). Шунингдек, у Франция ёшлар терма жамоаси сардори ҳисобланади.