Германия Бундеслигасининг 32-тури доирасида «Бавария» ўз майдонида «Хайденхайм» билан дуранг ўйнади — 3:3.
Учрашувнинг 22-дақиқасида грузиялик ҳужумчи Буду Зивзивадзе меҳмонларни олдинга олиб чиқди. Орадан тўққиз дақиқа ўтиб, Эрен Динкчи «Хайденхайм»нинг устунлигини икки баробарга оширди.
Мюнхенликлар Леон Горецканинг дубли эвазига мувозанатни тиклашга муваффақ бўлишди. Ярим ҳимоячи 44 ва 57-дақиқаларда рақиб дарвозасини ишғол қилди. Бироқ 76-дақиқада Зивзивадзе ҳам ўз ҳисобига иккинчи голни ёздириб қўйиб, меҳмонларни яна олдинга олиб чиқди.
«Бавария»ни мағлубиятдан дарвозабон Диант Рамайнинг 90+10-дақиқада ўз дарвозасига киритган голи қутқариб қолди.
Бундеслига чемпионлигини муддатидан олдин ҳал қилган «Бавария» 83 очко билан жадвалда пешқадамликни давом эттирмоқда. Венсан Компани жамоасининг чемпионатдаги беш ўйинлик ғалабали серияси якунланди. Мюнхенликлар 6 май куни ўз уйида Чемпионлар лигаси ярим финали доирасида «ПСЖ»га қарши жавоб учрашувини ўтказади (биринчи ўйин — 4:5).
«Хайденхайм» (23 очко) турнир жадвалининг сўнгги поғонасида қолмоқда.
«БАВАРИЯ» — «ХАЙДЕНХАЙМ» — 3:3
Голлар: Буду Зивзивадзе 22 (0:1), Эрен Динкчи 31 (0:2), Леон Горецка 44 (1:2), Леон Горецка 57 (2:2), Буду Зивзивадзе 76 (2:3), Диант Рамай 90-автогол (3:3).
«Бавария»: Урбиг, Ким Мин Джэ, Жонатан Та (Альфонсо Дэйвис, 77), Ито, Станишич (Йозуа Киммих, 46), Сапоко Ндиай (Ҳарри Кейн, 46), Конрад Лаймер, Павлович (Луис Диас, 46), Леон Горецка, Жамал Мусиала (Майкл Олисе, 46), Николас Джексон.
«Хайденхайм»: Рамай, Майнка, Ференбах, Буш, Шеппнер, Никлас Дорш (Зирслебен, 89), Беренс, Эрен Динкчи, Ибрагимович (Кербер, 81), Пирингер (Шиммер, 77), Буду Зивзивадзе (Кауфманн, 81).
Огоҳлантиришлар: Николас Джексон (45), Жонатан Та (72), Лаймер (85) — Рамай (45), Буш (90).
