Миланнинг «Интер» клуби аргентиналик ярим ҳимоячи Нико Пас борасида Мадриднинг «Реал» клуби билан музокаралар ўтказишни режалаштирмоқда. Бу ҳақда Tyc Sports журналистлари хабар бермоқда.
«Қироллик клуби» 21 ёшли ярим ҳимоячини қайта сотиб олиш ҳуқуқидан фойдаланиб, уни «Комо»дан ортга қайтармоқчи. Келишув суммаси тўққиз миллион еврони ташкил этади. Жорий мавсумда Пас «Комо» сафида 34 та учрашувда иштирок этиб, 12 та гол ва 7 та голли узатмани ўз ҳисобига ёздириб қўйди.
Transfermarkt портали экспертлари аргентиналик футболчини 65 миллион еврога баҳоламоқда. Ярим ҳимоячининг Италия клуби билан тузган меҳнат шартномаси 2028 йилнинг ўрталарига қадар мўлжалланган.
