«Барселона» устози Ханс-Дитер Флик жорий мавсумда уни энг кўп ташвишга солган жиҳат нима эканлигини айтди. «Кўк-анорранглилар» Ла Лиганинг шанба кунги баҳсида «Осасуна»ни мағлуб этиб (2:1), чемпионликни деярли нақд қилиб қўйишди. Агар бугун Мадриднинг «Реал» клуби очко йўқотса, каталонияликлар муддатидан олдин чемпионга айланишади, «қаймоқранглилар» ғалаба қозонган тақдирда эса титул масаласи бир ҳафтадан кейинги «Эл Класико»да ҳал қилиниши мумкин.

«Бу мавсумдаги асосий қийинчилик? Биз жуда кўп жароҳатларга дуч келишимизга тўғри келди. Назаримда, янги мавсум олдидан биринчи навбатда айнан мана шу жиҳат устида ишлашимиз керак», – деди Флик матбуот анжуманида.

Германиялик мураббий 2024 йилнинг ёзида «Барса» бошқарувини қўлга олган эди.