«Челси» ва «Арсенал» клублари Мадриднинг «Реал» жамоаси ҳужумчиси, қишдан бери ижара асосида «Лион»да тўп сураётган Эндрикка қизиқиш билдирмоқда. Бироқ «қаймоқранглилар» Лондон клубларига 19 ёшли форвардни сотиш ниятида эмасликларини маълум қилишди. Бу ҳақда TEAMtalk нашри хабар бермоқда.

Манбанинг таъкидлашича, «Реал» Эндрикнинг қайтишини кутмоқда ва у жамоанинг кейинги мавсум учун режаларига киритилган. Қайд этилишича, форварднинг ўзи ҳам «Мадридда қолиш ва асосий таркибдан жой олиш учун курашиш қарорида қатъий». «Қироллик клуби» президенти Флорентино Перес ҳамон дунё футболидаги энг иқтидорли ёш ўйинчи билан шартнома имзолаганига амин.

«Лион» таркибида Эндрик барча мусобақаларда 18 та ўйинда майдонга тушиб, 7 та гол уришга муваффақ бўлди. Ҳужумчининг Мадрид клуби билан амалдаги шартномаси 2030 йил ёзигача мўлжалланган. Transfermarkt портали маълумотларига кўра, футболчининг бозор қиймати 35 миллион еврони ташкил этади.