«Реал Мадрид»нинг испаниялик футболчилари Альваро Арбелоанинг жамоа юлдузларига ҳаддан ташқари меҳрибонлик кўрсатаётганидан норози бўлишмоқда.
El Mundo нашри берган маълумотларга кўра, мадридликлар кийиниш хонасининг испаниялик аъзолари, жумладан, Дани Карвахаль, Дин Хёйсен, Рауль Асенсио, Дани Себальос, Гонсало Гарсия, Альваро Каррерас ва Фран Гарсия, Арбелоа матбуот билан мулоқотда фақат юлдузларни мақташни афзал кўриб, маҳаллий ўйинчиларни эътибордан четда қолдирмоқда деб ҳисоблашади.
Таъкидланишича, мураббий ҳимоячи Каррераснинг ишга бўлган муносабатидан қониқмагани сабабли уни бир неча бор қайдномадан чиқариб ташлаган.
Шунингдек, баъзи футболчилар Арбелоани ёшларга ҳаддан ташқари ишониб юборишда айбламоқда. Бу эса ОАВда баъзи етакчи футболчилар, хусусан, Эдуардо Камавинганинг жамоани тарк этиши мумкинлиги ҳақидаги миш-мишлар тарқалишига сабаб бўлди. Охирги бир неча ҳафта давомида жамоада кескин муҳит ҳукм сурмоқда, баъзи ўйинчилар ўртасида эса нафақат майдонда, балки унинг ташқарисида ҳам тўғридан-тўғри зиддиятлар ва келишмовчиликлар юзага келган.
