Яқинда «Милан» матбуот хизмати Лука Модрич юз суяги синиши туфайли жорий мавсумда бошқа майдонга туша олмаслиги ҳақида расман маълум қилган эди. Шунга қарамай, марказий ярим ҳимоячи чемпионат якунига қадар сафга қайтиш ниятида.
La Gazzetta dello Sport нашрининг хабар беришича, хорватиялик футболчи ўтказилган операциядан бир ҳафта ўтиб «россонери» ихтиёрига қайтади. Модрич машғулотларда иштирок этишни ва А Сериянинг сўнгги турида «Кальяри»га қарши ўйинда майдонга тушишни хоҳламоқда. Эҳтимол, 40 ёшли хавбекка ўйнаш учун махсус ҳимоя ниқоби керак бўлади.
Модричнинг бундай қарори шу ёзда бўлиб ўтадиган Жаҳон чемпионати олдидан спорт формасини сақлаб қолиш истаги билан изоҳланмоқда. Жорий мавсумда ярим ҳимоячи 36 та ўйинда иштирок этиб, ўз ҳисобига иккита гол ва учта голли узатмани ёздириб қўйди.
