«Интер» ҳимоячиси Федерико Димарко Скудеттони қўлга киритганидан сўнг, ушбу ғалабани ўтган мавсумдан кейин унга шубҳа билан қараганларга бағишлади.

Кеча «нерадзурри» «Парма»ни 2:0 ҳисобида мағлуб этиб, Серия А якунига уч тур қолганида чемпионликни нақд қилди.

«Бу ажойиб туйғу. Милан шаҳрини қора-кўк рангларда кўриш — ўзгача завқ бағишлайди. Бу янги бошланиш таъмидир. Ўтган йилги муваффақиятсизликлардан сўнг, биз жамоа ва мураббийлар штаби билан биргаликда ўзимизни тикладик, қаттиқ меҳнат қилдик ва 21-Скудетто ҳақидаги орзуимизни амалга оширдик.

Биз аҳил жамоамиз ва ҳатто қийин дамларда ҳам бирдамликни сақлаб қолдик. Ҳар доим майдондаги ҳаракатларимиз билан жавоб бердик. Энди бу чемпионликдан завқланишимиз керак, чунки ўтган йилги воқеалардан кейин бу биз учун жуда катта аҳамиятга эга. Мен бу ғалабани барча яқинларимга, айниқса, ўтган мавсум охирида менга шубҳа қилиб, "Димарко тамом бўлди" деб ўйлаганларга бағишлайман», — деди Димарко «Интер» клуб телевидениесига берган интервьюсида.