Мюнхеннинг «Бавария» клуби вақтни илгарилаб кетмоқда — жамоа Чемпионлар лигаси ярим финали доирасидаги «ПСЖ»га қарши жавоб ўйинида келаси мавсум учун дизайн қилинган либосларда майдонга тушишни режалаштирган. Бу ҳақда расман эълон қилинди. Эҳтимол, Германия футболи гегемонини экипировка билан таъминловчи Adidas компанияси шу йўл билан ёз давомида сотувлардан кўпроқ даромад олишни кўзлаётгандир.
«Харизма, ишонч ва ғолиблик менталитети — янги либос дизайни айнан шу хусусиятларни ўзида мужассам этган. Тўқ қизил ранг унга ўзига хос жило бериб, Европа футболининг энг кучли жамиятлари билан боғлиқликни ифодалайди», — дейилади Adidas пресс-релизида.
Эслатиб ўтамиз, дастлабки учрашувда «Бавария» 4:5 ҳисобида мағлубиятга учраган эди.
