«Бавария» бош директори Ян-Кристиан Дрезен Чемпионлар лигаси ярим финали доирасидаги «ПСЖ»га қарши кечган биринчи баҳсдан (4:5) кейинги фикрлар билан ўртоқлашди.

– Биринчи ўйиндан кейин турли мамлакатлардан келаётган мақтовларни қандай баҳолайсиз?

– Ҳақиқатан ҳам жуда кўп ижобий фикрлар билдирилди. Пеп Гвардиоладан тортиб Тьерри Анригача — бутун дунёдаги мураббийлар, экспертлар ва афсоналар бу ўйинни юқори баҳолашди. Петер Шмейхель CBS телеканалида бундан яхшироқ ўйинни ҳеч қачон кўрмаганини айтди. Бу тарихий кеча бўлди, чунки Чемпионлар лигаси ярим финаллари тарихида ҳали ҳеч қачон бунчалик кўп гол урилмаган эди. Биз эса ўша оқшом стадионда бўлиш бахтига муяссар бўлдик.

Бироқ бу мақтовлар бизни Будапештдаги финалга олиб чиқмайди. Биз финалга чиқишни истаймиз ва бунинг учун мана шу кучли Париж жамоаси билан бўладиган баҳсда футбол оламини яна бир бор ҳайратда қолдиришимиз керак, — деди Дрезен.

Эслатиб ўтамиз, «Бавария» 6 май куни ўз майдонида парижликларни жавоб учрашувида қабул қилади.