Ўзбекистон Суперлигасининг 11-туридан ўрин олган сўнгги 3 та ўйин якунига етди.
“Хоразм” — “Андижон”
Хоразм шаҳрида ўтган баҳсда “Хоразм” жамоаси “Андижон”ни қабул қилди. Учрашув 0:3 ҳисобида меҳмонларнинг ғалабаси билан якунланди.
Баҳс андижонликларнинг устунлиги остида ўтди. Ҳисоб 15-дақиқада “Андижон”нинг грузиялик ярим ҳимоячиси Александре Андроникашвили томонидан очилди. 20-дақиқада Ҳумоюнмирзо Иминов бурчак зарбасидан сўнг ташкил этилган комбинацияни голга айлантирди. 90+5-дақиқада Драган Черан жамоасининг 3-голига муаллифлик қилди.
Ушбу ғалабадан сўнг “Андижон” 16 очко билан турнир жадвалининг 7-поғонасига кўтарилди. “Хоразм” эса 13 очко билан 10-ўринда бормоқда.
“Локомотив” — “Қизилқум”
Тошкент вилоятидаги Миллий футбол марказида “Локомотив” Навоийнинг “Қизилқум” жамоасини қабул қилди ва 1:0 ҳисобида ғалаба қозонди.
Учрашувда “темир йўлчилар” катта устунликка эга бўлди. Ўйиндаги ягона гол 62-дақиқада Темурхўжа Абдухолиқов томонидан киритилди.
Ушбу натижадан сўнг “Локомотив” 17 очко билан турнир жадвалининг 6-поғонасида бормоқда. “Қизилқум” эса 13 очко билан 11-ўринни эгаллаб турибди.
"Насаф" - "Навбаҳор"
Ўзбекистон Суперлигасининг 11-туридан ўрин олган сўнгги учрашув якунланди. Унда Қаршининг “Насаф” ва Наманганнинг “Навбаҳор” жамоалари ўзаро баҳс олиб борди.
Зомин шаҳридаги “Зомин” стадионида ўтган учрашувда 0:0 ҳисоби қайд этилди. Ўйин Наманган жамоасининг устунлиги остида ўтди, бироқ дарвозаларга гол киритилмади.
Ушбу натижадан сўнг “Навбаҳор” 20 очко билан турнир жадвалининг 4-поғонасини эгаллаб турибди. Темур кападзе бошқарувидаги жамоа ўзаро учрашувдаги мағлубият сабабли 20 очкога эга “Бухоро”дан (3-ўрин) ортда бормоқда. “Насаф” эса 14 очко билан 9-ўринга жойлашган.
Суперлигада узоқ муддатли танаффус юзага келади. Турнир 2026 йилги Жаҳон чемпионатидан сўнг давом эттирилади.
Ўзбекистон Суперлигаси, 11-тур
“Хоразм” — “Андижон” 0:3
Голлар: 0:1 — Андроникашвили (15), 0:2 — Иминов (20), 0:3 — Черан (90+5)
“Локомотив” — “Қизилқум” 1:0
Гол: 1:0 — Абдухолиқов (62, пен)
“Насаф” — “Навбаҳор” 0:0
