"Локомотив" бош мураббийи Мирко Еличич Суперлиганинг 11-тури доирасида бўлиб ўтган "Қизилқум"га қарши ўйин (1:0) борасида ўз фикрини билдириб ўтди.

— Ўйин жуда оғир ўтди. 65–70 дақиқа мобайнида ўйинни назорат қилдик. Голдан кейин эса натижани сақлаб қолишга ҳаракат қилдик. “Қизилқум” охиригача курашишини билардик, чунки жамоанинг жисмоний ҳолати жуда яхши. 3 очкодан мамнунман. Оғир ва муҳим уч очкони қўлга киритдик. “Қизилқум”нинг ўтган ўйинларини кўрганимизда, улар охиригача курашганини билгандик. Сифатли ўйин орқали ғалабага эришдик.

— Биринчи ва иккинчи бўлимлардаги ўйинни қандай баҳолайсиз?

— Гол урганимиздан кейин нималардир ўзгариши керак эди. Ўйинни назорат қилиш биз учун яхшироқ бўлди. Шунчаки вазиятлар бўлганда ўзимизни йўқотиб қўйдик. Лекин ўйиндан ўйинга яхшиланиб боряпмиз. Чунки жамоа футболчилари бундай босимларга ўрганиб қолишди. Тўпни олдинга тепиб юбориб, фақат курашиш — бизнинг услуб эмас. Бугун эса охиригача курашиб, очколарни қўлга киритдик.

— 11 та турдан кейин жамоа ўйинидан қониқяпсизми?

— Ҳа, мамнунман. Ёмон ўйнаган учрашувимиз бўлмади. 11 ўйиндаги сифат менга маъқул келди. Бизга барқарорлик етишмаяпти. Лекин бу янги жамоа, буни ҳамма тушуниб турибди. Футболчилар ўзларига бўлган ишончни ҳис қилишмоқда. Улар қайси жиҳатларни яхшилаш кераклигини билишади. Ёзда таркибнинг айрим нуқталарини кучайтиришимиз керак. Кубок ўйинларидан кейин бу борада жиддий ишлаймиз.

— Кубокдаги вазифа қандай?

— Кубокка жиддий қарайяпмиз. Кубок орқали халқаро майдонга йўлланма борлигини ҳамма тушуниб турибди. Бу жуда яхши имконият. Чунки “Локомотив” ОЧЛда ўйнамаганига анча бўлди. Шу сабабли Кубок биз учун муҳим. Бироқ шу билан бирга, бу мусобақада кам ўйнаган футболчиларга ҳам имконият беришимиз мумкин. Ҳозир асосий мақсад — баланс ва барқарорликни топиш.