Италиялик мутахассис Андреа Мальдера Украина терма жамоаси бош мураббийига айланишга яқин турибди. Бу ҳақда журналист Фабрицио Романо ўзининг ижтимоий тармоқларида маълум қилди.
Манбанинг хабарига кўра, келишувни расмийлаштириш жараёни якуний босқичда. Мальдера аввал ҳам терма жамоа штабида техник ривожланиш бўйича мураббий сифатида фаолият юритган. Шунингдек, у «Милан»да ўйинлар таҳлилчиси ва ёшлар жамоаси мураббийи, «Брайтон» ҳамда 2026 йилнинг февралида тарк этган «Марсель» клубларида ёрдамчи мураббий лавозимларида ишлаган.
Украина терма жамоаси ўтиш ўйинларида Швецияга имкониятни бой бериб, Жаҳон чемпионати йўлланмасидан маҳрум бўлган эди. Сўнгги 3 йил давомида жамоани Сергей Ребров бошқариб келаётганди.
