«Вест Хэм»нинг 21 ёшли марказий ярим ҳимоячиси Матеуш Фернандеш «Манчестер Юнайтед» эътиборига тушди.

Агар Лондон клуби АПЛдан тушиб кетадиган бўлса, португалиялик футболчи жамоани тарк этиши кутилмоқда. Шу билан бирга, «Вест Хэм» раҳбарияти футболчини таркибда сақлаб қолиш истагида.

The Telegraph нашрининг хабар беришича, манкунианликлар жорий мавсум давомида ярим ҳимоячининг ўйинларини диққат билан кузатиб боришган. Айниқса, сўнгги ҳафталарда Фернандешнинг ўйинини ўрганиш жараёни янада фаоллашган.

Маълумот учун, ушбу мавсумда ярим ҳимоячи АПЛнинг 33 та ўйинида майдонга тушиб, 3 та гол ва 3 та голли узатмани амалга оширди. У 2025 йилда 44 миллион евро эвазига «Саутгемптон»дан «Вест Хэм»га кўчиб ўтган эди.