Англия футболи афсонаси, “Лестер Сити” билан мўъжизавий чемпионликни қўлга киритган ҳужумчи Жейми Варди фаолиятини Қозоғистон чемпионатида давом эттириши мумкин. 39 ёшли форвардга Қозоғистон Премьер Лигасининг (ҚПЛ) чемпионлик учун курашаётган клубларидан бири қизиқиш билдирмоқда.

Offside.kz нашри берган хабарга кўра, гап айни дамда турнир жадвалининг юқори қисмида бораётган ва ҳужум чизиғини кучайтиришни мақсад қилган жамоа ҳақида кетмоқда. Жейми Вардининг трансфери ёзги трансфер ойнаси вақтида амалга оширилиши кутилмоқда.

Эслатиб ўтамиз, Варди 2025-йилнинг апрелида ўзининг қадрдон жамоаси “Лестер Сити”дан кетишини эълон қилган эди. Шундан сўнг, сентябрь ойида у эркин агент сифатида Италиянинг “Кремонезе” клуби билан бир йиллик шартнома имзолаган.

Ҳужумчининг жорий клуб сафида 25 та ўйинда майдонга тушиб, 5 та гол муаллигига айланган. Transfermarkt портали Вардининг қийматини 1 миллион еврога баҳоламоқда. Унинг Италия клуби билан шартномаси ёзги трансфер ойнаси вақтида якунига етади.

Вардининг Италия жамоаси билан шартномаси тугаётгани боис, у Қозоғистон клубига мутлақо бепул — эркин агент сифатида қўшилиши мумкин. Бу эса молиявий чекловлар мавжуд бўлган клублар учун жуда қулай имкониятдир.

Маълумот учун, ҚПЛ клублари сўнгги пайтларда жаҳон футболи юлдузларини ўз таркибига қўшиб олмоқда. Хусусан, 2026-йилнинг январь ойида “Ақтобе” клуби таниқли португалиялик футболчи Луиш Нани билан шартнома имзолаган эди. Вардининг Қозоғистонга келиши мамлакатдаги футбол нуфузини янада ошириши ва “Нани эффекти”ни давом эттириши кутилмоқда.