Лондоннинг «Арсенал» клуби Чемпионлар лигаси ярим финалида Мадриднинг «Атлетико» жамоаси устидан ғалаба қозонди. Ўтган ҳафта Мадридда бўлиб ўтган илк ўйинда ғолиб аниқланмаган эди (1:1), Лондонда эса «канонирлар» 1:0 ҳисобида устун келишди.
Учрашув якунланганидан сўнг «Арсенал» бош мураббийи Микель Артета ҳамкасби Диего Симеонени қўллаб-қувватлади.
«Диего билан бир-биримизни яхши биламиз. Финалга шу қадар яқин келганингда мусобақадан чиқиб кетиш доим оғир. Бу нима эканлигини биламан ва Симеонени жуда яхши тушуниб турибман, чунки бир йил аввал худди шундай ҳолатни ўзим ҳам бошдан кечирганман», — дея испаниялик мутахассиснинг сўзларини келтиради журналист Фабрицио Романо.
