Лондоннинг «Арсенал» клуби ярим ҳимоячиси Деклан Райс жамоанинг жорий мавсумдаги ўсиши ҳақида гапириб, бош мураббий Микель Артетанинг ролини алоҳида таъкидлаб ўтди.
«Сўнгги йилларда чемпионатда кўплаб аламли мағлубиятлар, кубок мусобақаларидан чиқиб кетишлар бўлди ва буларнинг барчаси одамга оғир ботади. Аммо мураббий вазиятни тўлиқ назорат қилди, биз жамоа қуришда ва ривожланишда давом этдик. Биз ҳам ушбу турнирда, ҳам Премьер-лигада бир-биримизни олдинга ундадик. Мавсум тугашига бир ой қолганда биз ажойиб позициядамиз», — дея Деклан Райснинг сўзларини келтиради УЕФА расмий сайти.
Эслатиб ўтамиз, ярим финалнинг жавоб учрашувида «тўпчилар» Мадриднинг «Атлетико» жамоасини 1:0 ҳисобида мағлуб этишди. Энди «Арсенал» финалда «Бавария» — «ПСЖ» жуфтлиги ғолиби билан куч синашади.
