Англия Премьер-лигасининг 35-турида «Ливерпуль» устидан қозонилган ғалабадан сўнг, «Манчестер Юнайтед» келаси мавсум учун Чемпионлар лигаси йўлланмасини нақд қилди. «Қизил иблислар» 64 очко жамғариб, жадвалда бешинчи ўриндан пастга тушмаслигини кафолатладилар, бу эса Европанинг энг нуфузли клублар турнирида иштирок этиш имконини беради.

Sky Sports нашрининг хабарига кўра, «Манчестер Юнайтед» Чемпионлар лигасига квалификациялангани учун 80 миллион фунт стерлингдан кўпроқ маблағ олади. Бу клубнинг ёзги трансферлари учун жиддий молиявий туртки бўлади.

Ушбу сумма қуйидагиларни ўз ичига олади:

Гуруҳ босқичидаги иштирокдан келадиган даромад — тахминан 70 миллион фунт;

Adidas компаниясидан бериладиган бонус — 10 миллион фунт.

Агар жамоа турнирда янада илгарилаб борса, яна 20 миллион фунтдан ортиқ маблағ ишлаб олиши мумкин. Қайд этилишича, бу маблағлар «Манчестер Юнайтед» учун трансфер бозорида янги футболчиларни сотиб олишда катта таъсир кўрсатади.