Лондоннинг «Арсенал» клуби бош мураббий Микель Артетага жорий ёзда янги шартнома таклиф қилишни режалаштирмоқда. Қарор жамоа мавсумни қандай якунлашидан қатъи назар, март ойидаёқ қабул қилинган.

Айни пайтда Артета совринлар учун курашга эътибор қаратган ва клуб лойиҳасига қизиқиш билдирмоқда, музокараларни кутаётгани айтилмоқда. Бу ҳақда журналист ва инсайдер Фабрицио Романо «Х» ижтимоий тармоғида маълум қилди.

5 май куни «Арсенал» Чемпионлар лигаси ярим финал жавоб учрашувида Мадриднинг «Атлетико» клубини мағлуб этди ва икки ўйин натижасига кўра финалга йўл олди. Финалда лондонликлар «Бавария» — «ПСЖ» жуфтлиги ғолиби билан куч синашади.

Артетанинг клуб билан амалдаги шартномаси 2027 йил июнига қадар мўлжалланган. Англия Премьер-лигасининг 35 туридан сўнг «Арсенал» 76 очко билан мусобақа жадвалида биринчи ўринни эгаллаб турибди.