Мадриднинг «Реал» клуби футболчилари Орельен Тчуамени ва Федерико Вальверде жамоа машғулоти вақтида деярли муштлашиб кетди. Marca нашри маълумотига кўра, ҳолат ўйин эпизодларидан биридаги қоидабузарликдан сўнг юзага келган ва футболчилар бир-бирини итаришга ўтган. Муносабатларни ойдинлаштириш ечиниш хонасида ҳам давом этган.

Жамоадаги мураккаб муҳит Ла Лиганинг 35-турида «Барселона»га қарши ўйин олдидан янада оғирлашган. Ушбу баҳс каталонияликлар учун чемпионлик ўйинига айланиши мумкин. Аввалроқ ҳимоячилар Антонио Рюдигер ва Альваро Каррерас ўртасида ҳам можаро бўлгани ҳақида хабарлар тарқалганди. Шунингдек, «Реал»нинг камида олти нафар футболчиси бош мураббий Альваро Арбелоа билан мулоқотни тўхтатгани, айрим ўйинчилар эса ҳатто бир-бири билан ҳам гаплашмаётгани айтилмоқда.

«Эл-класико» 10 май кунига белгиланган бўлиб, Барселонадаги «Спотифай Камп Ноу» стадионида ўтказилади. Каталония жамоасига чемпионликни қўлга киритиш учун мағлуб бўлмаслик кифоя. Испания чемпионатининг 34 туридан сўнг «Барселона» 88 очко билан пешқадам, «Реал» эса 77 очко билан иккинчи ўринда бормоқда.