«Бавария» дарвозабони Мануэль Нойер яна бир мавсум жамоада қолади ва яқин кунларда янги шартнома имзолайди. Бу ҳақда X ижтимоий тармоғида инсайдер Фабрицио Романо хабар берди.

Кеча Чемпионлар лигаси ярим финалида «ПСЖ»га қарши жавоб учрашувида жамоалар 1:1 ҳисобида дуранг ўйнади. Бироқ икки ўйин натижасига кўра мюнхенликлар 5:6 ҳисобида мағлуб бўлиб, мусобақани тарк этди. Германиялик посбон мазкур қарама-қаршиликда рақибнинг олтита зарбасидан олтита гол ўтказиб юборди: биринчи баҳсда бешта гол қўйиб юбориб, бирорта сейв амалга оширмади, иккинчи учрашувда эса битта гол ўтказиб юборди ва олтита сейв намойиш этди.

Манба маълумотига кўра, томонлар ўртасидаги музокаралар якуний босқичга кирган. «Бавария» раҳбарияти клубга таклиф қилинган бошқа дарвозабонлар агентларига ҳам Нойер яна бир мавсум жамоада қолишини маълум қилган.

Кутилишича, Мануэль Нойер асосий дарвозабон бўлиб қолади, аммо унинг ўринбосари Йонас Урбиг кўпроқ ўйин амалиётига эга бўлади. Шунингдек, Нойер Урбигга устозлик қилиши ва мураббийлар штабига уни ўз вориси сифатида тайёрлашда ёрдам бериши таъкидланмоқда. Қайд этилишича, ҳар икки дарвозабон ҳам бу ҳолатдан мамнун.

Жорий мавсумда Мануэль Нойер барча мусобақаларда 36 та учрашувда майдонга тушиб, 39 та гол ўтказиб юборди ва 11 бор ўз дарвозасини дахлсиз сақлаб қолди.