«ПСЖ» ҳужумчиси Усман Дембеле кетма-кет иккинчи мавсум Чемпионлар лигаси финалига йўл олгач, ижтимоий тармоқларда «Барселона» ярим ҳимоячисининг эски интервьюсидан парча эълон қилди.
«Кўпчилик мени футбол ўйнашни билмайди деб ўйлайди. Улар футболдан ҳеч нарсани тушунишмайди. Бу ҳақиқат», — деган эди Гави матбуот анжуманларидан бирида.
Усман Дембеле 2023 йилда «Барселона»дан 50 миллион евро эвазига «ПСЖ»га ўтган эди. Унинг шартномаси 2028 йилнинг 30 июнига қадар мўлжалланган.
Жорий мавсумда ҳужумчи парижликлар сафида барча турнирларда 36 та ўйинда майдонга тушиб, 19 та гол урди ва 10 та голли узатмани амалга оширди. Transfermarkt портали Дембеленинг трансфер қийматини 100 миллион еврога баҳоламоқда.
