Мадриднинг «Реал» клуби бош мураббийи Альваро Арбелоа ёш ярим ҳимоячи Тьяго Питарчга ишонишда давом этади. Бу ҳақда Marca нашри хабар бермоқда.
18 ёшли футболчи сўнгги пайтларда клуб ичидаги турли қарашларга қарамай, етарлича ўйин амалиётига эга бўлмоқда. Раҳбариятдаги айримларга академия тарбияланувчисининг асосий таркиб юлдузлари, жумладан, Эдуарду Камавинганинг ўрнига майдонга тушаётгани маъқул келмаган. Бироқ Арбелоа Питарч билан жамоа ўйинида мувозанат яхшироқ сақланишига ишончи комил.
Яқинда «Эспаньол» устидан қозонилган ғалабадан сўнг мураббий шундай деган эди: «Реал» смокингдаги ўйинчилар устига эмас, балки учрашувни терлаган, ҳаракат ва фидойилик билан тўлиб-тошган формада якунлайдиган футболчилар устига қурилади».
Питарч асосий таркибда тушган 9 та ўйинда мадридликлар фақат икки бор мағлуб бўлишди. Ёш хавбек «Манчестер Сити», «Атлетико» ва «Бавария» каби грандларга қарши баҳсларни дастлабки дақиқалардан бошлаган. Унинг бозор қиймати эса аллақачон 20 миллион еврогача кўтарилди.
