Шахмат бўйича амалдаги жаҳон чемпиони Гукеш Доммараджу Варшавадаги турнир олдидан берган интервьюсида ҳамюртимиз Жавоҳир Синдаров ҳақида ўз фикрлари билан ўртоқлашди. Интервьюнинг асосий нуқталари:
Номзодлар турнири ҳақида:
"Жавоҳир Номзодлар турнирида эришган натижа шунчаки ҳайратланарли ва ўта доминант. У ўтган йили Жаҳон кубогини ютиб, ўзининг қанчалик кучли эканлигини кўрсатган эди. Унинг элитага олиб кирган янги энергияси шахмат олами учун жуда фойдали".
Бўлажак Жаҳон чемпионлиги баҳси ҳақида:
"Жавоҳир ва мен деярли тенгдошмиз. Номзодлар турнири ва Жаҳон чемпионлиги учун матч — бу бутунлай бошқа-бошқа мусобақалар. Шунинг учун ҳозирги натижалардан узоқ муддатли хулоса чиқармаган бўлардим. Олдинда бизни жуда ҳаяжонли баҳс кутмоқда".
Фаворит ким?
"Одатдагидек, мен фаворитларга ишонмайман. Ким ўша белгиланган кунда ўзининг энг яхши ўйинини кўрсатса, ўша ғалаба қозонади. Менинг мақсадим бор маҳоратимни кўрсатиш".
