«Реал» ярим ҳимоячиси Федерико Вальверде Ла Лиганинг 35-тури доирасидаги «Барселона»га қарши ўйинда майдонга тушмайди, деб хабар бермоқда журналист Абраҳам Ромеро.
Манбанинг берган маълумотига кўра, шифокорлар уругвайлик футболчига Орельен Тчуамени билан содир бўлган муштлашув вақтида бошидан олган зарбаси туфайли камида бир ҳафта давомида машғулотларда қатнашмасликни ва ўйинларда иштирок этмасликни тавсия қилишган.
Аввалроқ, Вальверде ва Тчуамени Мадрид клуби машғулоти вақтида муштлашиб қолгани хабар қилинган эди. Ушбу воқеадан сўнг Федерико шифохонага олиб борилган ва у ерда унинг жароҳатига чоклар қўйилган.
Оммавий ахборот воситаларининг хабар беришича, «Реал» футболчиларга нисбатан интизомий суриштирув ишларини бошлайди ва ички регламентга асосан чора кўришни режалаштирмоқда.
10 май куни «Реал» Испания чемпионатининг 35-тури доирасида «Камп Ноу» стадионида «Барселона»га қарши майдонга тушади. Ўйин Тошкент вақти билан соат 00:00 да (11 майга ўтар кечаси) бошланади.
