«Реал»нинг собиқ ҳимоячиси Фабио Каннаваро Мадрид клубининг 2007/08 ва 2025/26 йиллардаги таркибларини ўзаро таққослади. Ҳужумчилар ҳақида гапирганда, италиялик мутахассис Руд ван Нистелройни Килиан Мбаппедан юқори қўйди. Бу ҳақда Primevideosportit хабар бермоқда.
Нидерландиялик ҳужумчи 2006 йилдан 2010 йилгача «Реал» шарафини ҳимоя қилган. Шундан сўнг у «Гамбург» ва «Малага»да ўйнаб, 2012 йилда фаолиятини якунлаган. Ван Нистелрой мадридликлар таркибида икки марта Ла Лигада ғолиб чиққан.
Эътиборли жиҳати шундаки, ўша мавсумлар (2006/07 ва 2007/08) ҳозирча «Реал» кетма-кет икки марта Испания чемпиони бўлган сўнгги йиллар бўлиб турибди. Мбаппе 2024 йилдан бери «Реал»да ўйнамоқда, аммо Килиан ҳали клуб билан Ла Лигада зафар қучгани йўқ.
