«Барселона» ҳимоячиси Эрик Гарсия Мадриднинг «Реал» клуби билан ўйин олдидан журналистлар билан суҳбатлашди. Ханс-Дитер Флик жамоасига чемпионликни кафолатлаш учун бўлажак «эль класико»да бир очко кифоя қилади.

«Сўнгги икки йилда «Реал»га қарши жуда яхши ўйнаяпмиз. Ҳа, биринчи даврада Мадридда мағлуб бўлдик, лекин ҳозир ажойиб ҳолатдамиз. Бу идеал сценарий: биз ўз стадионимизда, мухлисларимиз кўз ўнгида «эль класико»да чемпион бўлишимиз мумкин. «Реал» энг асосий рақибимиз бўлиб қолмоқда, шунинг учун ўйин ўзига хос бўлади.

Бизга дуранг ҳам етарли, лекин биз ғалаба қозонишга ҳаракат қиламиз. Майдонга тушиб, худди аллақачон чемпион бўлгандек ўйнаш хато бўларди. Дуранг ҳақида эмас, ғалаба ҳақида ўйлаш керак», – дея Гарсиянинг сўзларини Barca Universal нашри келтирмоқда.

Учрашув якшанба куни Тошкент вақти билан соат 00:00 да (11 майга ўтар кечаси) бошланади.