«Барселона»нинг афсонавий собиқ сардори Карлес Пуйоль Мадриднинг «Реал» клуби футболчиларидан кимни ўз севимли жамоасида кўришни исташи ҳақидаги саволга жавоб берди. Машҳур испаниялик сўнгги пайтларда ақл бовар қилмас сермаҳсуллик кўрсатаётганига қарамай, обрўсига бироз путур етган ҳужумчи Килиан Мбаппени танлади.
«Реал»дан кимни сотиб олган бўлардим? «Барселона»нинг таркиби шундоқ ҳам жуда яхши, лекин агар битта футболчини танлаш керак бўлса, эҳтимол, Мбаппени айтган бўлардим», – дея Пуйолнинг сўзларини BarcaTimes нашри келтирмоқда.
Франциялик юлдуз 2024 йилдан бери «қаймоқранглилар» шарафини ҳимоя қилиб келмоқда. Жорий мавсумда 27 ёшли ҳужумчи 41 та ўйинда майдонга тушиб, 41 та гол ва 6 та голли узатмага муаллифлик қилди.
