«Реал» бош мураббийи Альваро Арбелоа Испания чемпионати доирасидаги «Барселона»га қарши ўйин олдидан матбуот анжуманида иштирок этди. Учрашув 10 май куни Тошкент вақти билан тунги соат 00:00 да бошланади.

— Сўнгги кунларда содир бўлган воқеаларни қандай изоҳлай оласиз?

«Иккита муҳим нарсани айтишим керак. Биринчидан, клубнинг ушбу вазиятга қанчалик қатъий, тезкор ва очиқ муносабат билдирганидан фахрланаман. Иккинчидан, футболчилар ўз хатоларини тан олганлари, афсусда эканликларини билдириб, кечирим сўраганларидан мамнунман. Мен учун шунинг ўзи кифоя. Мен уларни омма олдида «гулханда ёқмоқчи» эмасман, чунки улар бунга лойиқ эмас. Ушбу 4 ой ва ўтган йиллар давомида улар «Реал Мадрид» футболчиси бўлиш нимани англатишини тушунишларини исботлашди ва мен буни унутмайман.

Федерико Вальверде ва Орельен Тчуамени ушбу вазиятни унутиб, бу клуб учун курашишда давом этиш имкониятига лойиқдирлар. Мен улар билан фахрланаман. Ушбу вазиятдан фойдаланиб, уларнинг профессионаллигини шубҳа остига қўйишларига йўл қўймайман: уларнинг нопрофессионал эканлиги ёки менга нисбатан ҳурматсизлик қилгани ҳақидаги гаплар — мутлақо ёлғон. Шунингдек, улардан кимдир мен билан бўлган муаммо ёки «Реал»дан ташқаридаги ҳаёти сабабли ўйнамаётгани ҳақидаги хабарлар ҳам уйдирмадир.

Мен ушбу мавсум клуб даражасига мос келмаётгани учун биринчи навбатда масъулиятни ўз зиммамга оламан. Лекин мен бу ерда бор-йўғи 4 ойдан бери ишлаяпман ва футболчиларим билан фахрланаман. Улар мени қандай қабул қилганлари, айниқса, бошимиздан ўтган воқеалардан кейинги ҳолат мени қувонтиради. Шуниси аниқки, ҳафсала пир бўлиши ва ғазаб сизни ўзингиз истамаган вазиятларга бошлаб бориши мумкин. Аммо энди асосий эътиборни ўйинга қаратишимиз керак», — дея мураббийнинг сўзларини келтиради AS нашри.

Ҳозирда «Реал» турнир жадвалида иккинчи ўринда бормоқда ва пешқадам «Барселона»дан 9 очко ортда қолмоқда.