МЛС мунтазам чемпионати доирасида «Интер Майами» сафарда «Торонто» меҳмони бўлди. Қизиқарли ва голларга бой кечган баҳс флоридаликларнинг 4:2 ҳисобидаги ишончли ғалабаси билан якунланди.
Меҳмонлар сафида Лионель Месси ҳақиқий шоу намойиш этди: 38 ёшли аргентиналик юлдуз ўз ҳисобига битта гол ва иккита голли узатма ёздириб қўйди. Бу Месси учун фаолиятидаги 907-гол сифатида қайд этилди. Шунингдек, «Интер Майами»нинг қолган голларига Родриго де Пауль, Луис Суарес ва Серхио Регилон муаллифлик қилишди. Мезбонлар сафида Эмилио Аристасабаль дубль қайд этди.
Ушбу ғалабадан сўнг «Интер Майами» очколари сонини 22 тага етказиб, Шарқий конференция турнир жадвалида иккинчи ўринга кўтарилиб олди. «Торонто» эса 14 очко билан саккизинчи поғонада қолмоқда.
