Футбол бўйича Франция иккинчи дивизиони доирасидаги «Бастия» ва «Ле-Ман» жамоалари ўртасидаги баҳс трибуналардаги тартибсизликлар туфайли ҳакам томонидан тўхтатилди.

Бастия шаҳрида бўлиб ўтган учрашувнинг қўшиб берилган дақиқаларида, ҳисоб «Ле-Ман» фойдасига 2:0 кўринишига келгач, маҳаллий мухлислар майдонга турли буюмлар, жумладан, петардалар улоқтиришни бошлаган. Вазият кескинлашгани сабабли ўйинни давом эттириш имкони бўлмаган.

Маълумот учун, ушбу учрашув икки жамоа тақдири учун ҳам ўта муҳим аҳамиятга эга эди. Ғалаба «Ле-Ман»га мамлакат юқори дивизиони — Лига 1 йўлланмасини тақдим этса, «Бастия» мағлубият туфайли учинчи дивизионга тушиб кетиши мумкин.

Эслатиб ўтамиз, аввалроқ «Труа» жамоаси 67 очко билан муддатидан олдин Лига 1 йўлланмасини қўлга киритган эди. Жамоа охирги марта 2022/23 йилги мавсумда элитада иштирок этган.