«Ювентус» бош мураббийи Лучано Спаллетти А Сериянинг 36-тури доирасида «Лечче» устидан қозонилган ғалабадан (1:0) сўнг ўз фикрлари билан ўртоқлашди. Мутахассис жамоасининг ўйинидаги барқарорлик етишмаётганидан норозилигини яширмади.

«Биз анчадан бери бир хил хатоларни такрорлаётганимиз ҳақида гапириб келяпмиз: ўйин бошида гол урамиз ва кейин охиригача фаол ўйнамаймиз. Майдонда устунлик қиламиз, вазиятни тўлиқ назорат қилаётгандек туюламиз, аммо кейин диққатни йўқотиб, даражамизга мос бўлмаган хато узатмаларни амалга оширамиз. Ўйин давомида қатъият ва шижоатни сақлаб қола олмаяпмиз. Хато қилганимиз заҳоти қўрқув ва ҳаяжон устунлик қилиб, ўйин суръати ўзгариб кетмоқда», — дейди Спаллетти Football Italia нашрига.

Шунингдек, мураббий жамоадаги трансфер миш-мишларига ҳам тўхталиб ўтди: «ОАВда таркибдаги 25 нафар футболчидан 18 тасини алмаштиришимиз ҳақида ёзишмоқда, лекин бунинг иложи йўқ. Бу жиддий лойиҳа, демак, ҳозирги футболчиларнинг кўпчилиги жараёнга жалб қилиниши керак. Бир йўла шунча одамни алмаштириш жуда мураккаб вазифа».