«ПСЖ» бош мураббийи Луис Энрике Франция чемпионатининг 33-туридан ўрин олган «Брест»га қарши учрашув олдидан таркиб борасидаги фикрлари билан ўртоқлашди. Испаниялик мутахассис бўлажак баҳсда клуб академияси тарбияланувчилари майдонга тушишини тасдиқлади.

Мураббий ёш футболчиларнинг хатолари учун ҳаддан ташқари танқид қилинишидан норозилигини яширмади.

«Таркибда тарбияланувчилар бўлади. Умид қиламанки, ёш футболчининг ёки профессионал ўйинчининг хатоси худди аввалроқ Пьер билан содир бўлганидек қаттиқ танқидларга сабаб бўлмайди. Мен учун бундай ҳолатларни кузатиш — фалокат... Эртага академия вакиллари ўйнайди», — дейди Энрике Le Figaro нашрига берган интервьюсида.

Шунингдек, Энрике жамоадаги жароҳатлар билан боғлиқ вазиятга ҳам тўхталиб ўтди:

«Тиббий ҳисоботда кўрсатилган ўйинчиларнинг ҳеч бирида жиддий муаммо йўқ. Бундай тиғиз ва шиддатли ўйинлардан кейин кичик жароҳатлар бўлиши табиий ҳол, хавотирга ўрин йўқ».