Миланнинг «Интер» клуби ярим ҳимоячиси Генрих Мхитарян жамоада яна бир мавсум қолиши мумкин. Инсайдер Никола Скиранинг хабарига кўра, «нерадзуррилар» раҳбарияти футболчига 2027 йилнинг ёзига қадар мўлжалланган янги меҳнат шартномасини таклиф қилишга тайёр.

Бироқ, 37 ёшли ярим ҳимоячининг ўзи фаолиятини давом эттириш борасида ҳали бир қарорга келмаган. Хабарда айтилишича, арманистонлик футболчи шу ёзда профессионал фаолиятига нуқта қўйиши эҳтимолдан холи эмас.

Маълумот учун, Мхитарян 2022 йилдан буён «Интер» шарафини ҳимоя қилиб келмоқда. У жорий мавсумда барча мусобақаларда 36 та ўйинда майдонга тушиб, ўз ҳисобига 4 та гол ва 3 та голли узатмани ёздириб қўйди. Унинг клуб билан амалдаги келишуви шу йилнинг июнь ойи охирида ўз ниҳоясига етади.