"Милан" ярим ҳимоячиси Кристиан Пулишич А Сериянинг 36-тури доирасидаги "Аталанта"га қарши уй учрашуви олдидан ўтказилган сўнгги машғулотда жароҳат олди.
Журналист Джанлука Ди Марцио берган маълумотларга кўра, америкалик футболчи думба мушакларини шикастлаб олган. Натижада Массимилиано Аллегри бошчилигидаги мураббийлар штаби сўнгги соатларда тактик режаларга ўзгартириш киритишга мажбур бўлди. Таъкидланишича, асосий таркибда Пулишичнинг ўрнини Рафаэл Леау эгаллайди. Футболчининг жароҳати қай даражада жиддий экани ва тикланиш муддати тиббий кўрикдан сўнг маълум бўлади.
"Аталанта"га қарши баҳс "Милан" учун Чемпионлар лигаси йўлланмасини қўлга киритишда стратегик аҳамиятга эга. Кеча "Ювентус"нинг "Лечче" устидан қозонган ғалабасидан сўнг, 67 очкога эга "россонерилар" турнир жадвалида 4-ўринга тушиб кетди. Айни дамда миланликлар 5-ўриндаги "Комо"дан (36 ўйинда 65 очко) икки очко, битта захира ўйинига эга "Рома"дан (64 очко) эса уч очко олдинда бормоқда.
Эслатиб ўтамиз, "Милан" ва "Аталанта" жамоалари ўртасидаги баҳс бугун Тошкент вақти билан соат 23:45 да бошланади.
